另一場女子世青盃16強，東道主哥倫比亞女足U20迎戰南韓女足U20。哥倫比亞今屆演出極具說服力，3場分組賽全勝兼未失1球，球隊嘅成功建基於穩健防守，佢哋3仗總入球全開2球或以下，今仗直取中位數2.5球入球細。（周四早上9時開賽）
哥倫比亞女足近年表現起飛，最大賣點就係防守力強，上屆佢哋入到8強都係靠防守搵食，連埋今屆在內，哥倫比亞對上10場女子世青盃，有9場都係開2球或以下，嚟到淘汰賽只求晉級情況下，好可能領先1球就大踢穩陣波，一直守到完場。
女太極虎防線硬淨
南韓女足上仗爆冷1比0擊敗德國女足U20，以其中一支小組最佳第3名晉級，「女太極虎」雖然實力一般，但成班球員勝在體力同拚勁一流，要攻入佢哋亦唔容易，今屆3仗只失過1球，今仗有望為哥倫比亞嘅晉級構成阻力，預料兩軍差距唔會太大，2.5球細盤值得捧場。