歐國盃A2組繼續有大戰上演，首輪輸波嘅法國將會喺主場迎戰比利時，形勢同面子上，都要避免主場2連敗嘅噩夢發生。法國勝在人才鼎盛，一眾年輕新兵足夠應付3日兩戰嘅賽程，相反比利時靠老將奇雲迪布尼支撐，體力未必跟得上主隊，博法國主勝好路。（周二凌晨2時45分開賽）
法國上仗意外1比3輸畀意大利，球員明顯仲未入局，今次再喺主場出擊肯定唔可以再衰，相信會的起心肝爭勝。法國上仗起用唔少新人，今仗輪換將用番常規主力，奧士文尼迪比利、馬古斯杜林同高路梅安尼等攻擊手有望擔正，活力同經驗都夠晒保證。
法國喺歐國盃表現受到批評，不過論防守力喺球壇數一數二，係球隊長年成績穩定嘅最大原因，加上前場有基利安麥巴比可以憑一己之力扭轉戰果，主場贏面仍高。睇番法國近3次對住比利時都贏晒，有「格食格」味道。
比利時齋靠迪布尼
比利時上仗主場3比1贏以色列，喺盧卡古缺陣之下，靠奇雲迪布尼梅開二度撐住，呢位33歲核心近年多傷患，上仗又踢足90分鐘，要同法國生力軍撼難免輸蝕，比利時威力勢必大減，好大機會全失3分，一於博法國主勝。