歐國盃16強終於塵埃落定，今屆烏龍波特別多，暫時入波最多嘅球員，就係有3球在手嘅格魯吉亞前鋒米卡達捷，令人意外，不過格軍喺16強撞正西班牙，相信佢好難再有進帳，而且佢喺足智彩神射手選項屬於「其他」，只得4.15倍唔值博。至於入2球嘅加普、艾雲舒蘭斯（其他）、拉斯雲馬連（其他）、穆斯亞拿亦唔算標青，同有2球在手嘅富克洛只係後備，而哈利卡尼、基利安麥巴比等大牌球星入得1粒，C朗更加未開齋，仲未上力。
冷敲土耳其查漢奴古
喺呢種大混戰環境，入到4球都有機會拎金靴，甚至唔排除出現幾個並列射手榜榜首，要靠助攻等先分到高下，但最重要係足智彩「神射手」項目唔會計呢啲，只會係計入球數字，例如上屆C朗與柏德列舒希克各入5粒，投注兩位射手注項都能勝出，不過每注金額的一半會獲得派彩，如果你買嗰個球員熱到得3倍，就只獲1.5倍派彩，非常唔抵。
因此，「神射手」不妨扒啲冷門，就算真係要同幾個瓜分都冇咁蝕。策略上會喺上下線球隊各揀一個，上線球隊會揀西班牙嘅艾華路莫拉達，喺分組賽尾輪只係下半場末段入嚟踢咗一陣，抖到夠預備淘汰賽，西班牙3連勝兼攻力銳利，尤其係兩翼傳中打法堅煞食，嚟緊16強只係對格魯吉亞，預計莫拉達會有大把數胡機會，仲有11倍確係唔錯。
下線球隊方面，推介現時入咗1球嘅土耳其中場查漢奴古，佢唔單止擅於遠射，仲係球隊處理罰球同12碼嘅劊子手，土耳其喺16強遇上防守立立亂嘅荷蘭，呢位隊長有機會增添士哥，依家有80倍值博。