今晚英冠附4強次回合，米禾爾（圖左）返主場再鬥侯城。首回合互交白卷，既然大家都冇着數蝕底，今仗都係穩字行頭，近年碰頭旺開半場和，不妨再追。（無綫myTV Super周二凌晨3時直播）文:法達斯維
首回合悶和次回合唔敢谷
米禾爾偏重防守，46輪只失49球，不過僅入64粒，係前10名中入波第2少球隊，睇埋首回合造訪侯城，無論係控球（62%）及射門次數（15次）都佔上風，但中目標埋門得2次咁大把，難怪「窿窿」收場。
侯城於煞科日擊敗諾域治，得以反壓域斯咸殺上第6，趕上搭附加賽尾班車。「老虎仔」季尾戰績一般，撇除煞科戰贏諾域治，之前6仗只得4和2負，加上首回合主場對米禾爾幾經辛苦才守和0比0，表現唔算標青。翻查紀錄，雙方近5次交鋒，有4次半場打和，何況首回合未分高下，今仗唔使急於搶攻，睇準先出擊，隨時又開半場和。