今晚歐協聯4強首回合焦點戰，薩克達於波蘭中立場硬撼水晶宮。烏克蘭班霸薩克達踏入淘汰賽後以攻代守，水晶宮有射手伊斯美拿沙亞助陣，唔怕同你鬥攻，捧2.5球大盤更上算。
（Now 638周五凌晨3時直播）文:法達斯維
薩克達喺土耳其名宿阿達杜倫帶領下崇尚進攻，呢位39歲少帥喺球員時代效力過馬體會同巴塞，2014年更協助馬體會勇奪西甲冠軍及殺入歐聯決賽。
水晶宮歐協入波第2多
阿達杜倫自上年5月接手薩克達後，不但穩居聯賽榜首，佢哋喺今屆歐協聯10場共轟入19粒，係入波第3多球隊之一，尤其係踏入淘汰賽踢得更進取，近4仗歐協聯共入9球，全開3球或以上，其中艾利臣辛坦拿近2仗歐協聯入3粒，絕對係水晶宮心腹大患。
另邊廂，水晶宮係今屆歐協聯奪冠大熱，唔好睇佢哋喺英超咁偏重防守，喺歐協聯已經入咗20球，只係比出咗局嘅AEK雅典少1粒，係火力第2強球隊之一。雖然水晶宮於之前晉級過程跌跌碰碰，但8強對住實力分子費倫天拿，兩回合計以4比2淘汰對手，贏得好有說服力，射手伊斯美拿沙亞今屆10場入咗7球，係依家未出局球隊中入波最多球員，攻力有保證，為爭入決賽唔會保守，鬥攻情況下，今仗實多波入，2.5球大盤捧得過。